Bloqlar

Layihəmi necə həyata keçirə bilərəm?

“Bir ideyam var, amma nə edəcəyimi bilmirəm.”

“Layihəm üçün ilk addımı necə atmalıyam?”

“Əla bir layihəm var, necə həyata keçirə bilərəm?”

Yuxarıdakı kimi düşüncələr sizin də ağlınıza gəlirsə, bu yazımızda sizə yardım edəcək məlumatlar paylaşacağıq. Yazımızı olduğu qədər anlaşılan dildə yazmağa çalışdıq. Ümid edirik, layihələrinizi həyata keçirməyə kömək edə bilərik :)

Əvvəlcə problemi aydınlaşdırmaq lazımdır. “Ağlınızdakı layihə hansı problemi həll edir?” bunu müəyyənləşdirmək lazımdır. Çünki əsas məsələ layihənizin özü deyil, hansı problemi həll etdiyidir. Problemi düzgün şəkildə müəyyənləşdirmək sizə hədəflərinizə çatmağınızda yol göstərəcək və lazımsız şeylərə vaxt ayırmanızın qarşısını alacaq. Həmçinin sizin layihənizə oxşar layihələrlə qarşılaşdıqda aralarındakı fərqi anlamağınıza kömək edər. Çünki bəzi layihələrin əsas fikri eyni olsa da, diqqət yetirdikləri problemlər fərqli ola bilər.

Araşdırma edin. Layihənizin daxil olduğu sektoru ətraflı şəkildə araşdırmağınız sizə kömək edəcək. Bu sahədəki uğurlu layihələr, uğursuz layihələr və onların uğurlu və ya uğursuz olma səbəblərini araşdırın. Bu sahədə gəlir varmı? Hədəf kütləm kimlər olacaq? Hansı işləri görsəm uğurlu olaram? Kimi suallara cavab tapın. Sonda etdiyiniz araşdırmalar nəticəsində layihənizi necə planlaşdıracağınız haqqında ətraflı məlumatınız olacaq.

Tələsməyin! Layihənizi həyata keçirib onu insanlara təqdim etmək olduqca insanı həyəcanlandırır. Lakin belə ani duyğularla hərəkət etmək düzgün deyil. Hərşeyi yavaş-yavaş və detallı bir şəkildə planlaşdırıb ən mükəmməl şəkildə reallaşdırmaq üçün çalışmalısınız. Nə deyiblər? Tələsən təndirə düşər.

Layihəsi uğurlu olan şəxslərlə əlaqə saxlamağa çalışın. Layihəsi uğurlu olan şəxslər sizin hal-hazırda keçdiyiniz yollardan keçiblər. Qarşılarına birçox problemlər çıxıb və onları həll edərək uğurlu bir layihə həyata keçiriblər. Onlarla əlaqəyə keçərək sizə tövsiyələr vermələrini istəyə bilərsiniz. Əmin olun, bu, çox işinizə yarayacaq.

Hədəf kütlənizi müəyyənləşdirin. Hərkəsə çatmağa çalışmayın. Sizin layihənizin aid olduğu bir sektor var. Və bu layihə hərkəs üçün maraqlı olmayacaq. Çünki insanlar müxtəlifdir. Hərkəsin maraq dairəsi fərqlidir. Onun üçün də sizin layihənizin maraqlı olduğu şəxslərə çatmağa çalışın. Aid olduğunuz sektoru araşdırarkən hədəf kütlənizi də müəyyənləşdirmək üçün məlumatlar əldə edəcəksiniz. Əmin olun ki, böyük bir kütləyə çatmaqdansa, öz xüsusi hədəf kütlənizin olması daha uğurlu bir layihə həyata keçirmək üçün önəmlidir. Çünki hərkəsə çatmağa cəhd etsəniz, sizin layihənizi bəyənməyən və sizə öz iradlarını bildirənlərin sayı həddindən artıq çox olacaq. Çünki bu onlar üçün maraqlı olmayacaq və siz ruhdan tez düşəcəksiniz. Əslində isə tək problem öz hədəf kütlənizi düzgün müəyyən etməməyiniz olacaq.

Sosial şəbəkəldə aktiv olun. Öz layihəniz üçün xüsusi səhifə yaradın. Daha çox Instagram, Facebook və LinkedIn platformalarında səhifə yaratmağa çalışın. Və hər birini aktiv idarə edin. Yuxarıda qeyd etdiyimiz kimi bu platformalarda da öz xüsusi hədəf kütlənizə çatmağa çalışın. Rəqiblərinizin səhifələrinə nəzər yetirin. Nələr paylaşdıqlarına, hansı aralıqlarla paylaşım etdiklərinə, paylaşımlarının uğurlu olub-olmadığına baxın. Uğurlu paylaşımlarını fərqli bir şəkildə öz səhifənizə tətbiq edə bilərsiniz.

Sizə layihənizi uğurlu bir şəkildə həyata keçirmək üçün birçox tövsiyələr verdik. Ümid edirik, bunlar sizin üçün faydalı olar. Artıq sizə qalan tək şey ilk addımı atmaqdır. Unutmayın! Böyük ideyalar kiçik başlanğıclarla başlayır. Elə sizin bu bloqu oxumağınız da kiçik bir başlanğıc oldu :)